Alla Itolae Nusa 3
Niakwe binatane rebe enloe titinai bei pusue binatana nda kmalane rebe TUHANE Alla Itolaule. Niakwe mere etneu binare be, “Alla Ilake imi bei pusue aia mei ndinure esi buaiju leke imi kane more, tinai o?”
Bina mere iralake be, “Mo. Pusue aia mei ndinu meije esi buaije ami kanele yele,
po aini rebe mei ndinure esi tlaije, Alla Ilake ami beie leke kane bei esi buaije yake, pise kerike yake, po mo hoko ami mata.”
Po niakwe ebeteke be, “Mo. Imi mata mo.
Irekwa be kena imi kanele imi nati titinai, imi rekwa saisa rebe nkenale kai tiare saka Alla Irekwa nkenale kai tiare.”
Bina mere iselu be ai aini mere esi buaije mise kena kanele, selue ntele. Lalei kena irekwa titinai hoko irana esi buaije, ikanele kai iriluke ete eni mokwai rebe ime kaini ete mere, eleki eni mokwai ikane lekwe.
Kena esi kane ai buai mere pelare laleisu rekwa kai nati sosoli be esi kalaku. Bei mere hoko esi boli ara loini kena obi nanakwalaisu.
Kena esi lene TUHANE Alla Itnipa me ndinure kena kmaure, eleki tamata mere kai eni bina luasi kbuni beiNi me aia uweiju.
Po TUHANE Alla Ikoti loko mokwai mere be, “Aetia?”
Mokwai mere iralake be, “Au lene Amei ndinu meije, au rilaku, le au kalaku hoko au kbuni.”
Eleki Itneu be, “Sire pine ibeteke etemu be akalakure? Le mula pine ai aini rebe Au lake kena kane esi buaije more, akanele?”
Mokwai mere iombe, “Le bina rebe Arilukeni kena itapa aure, ile mere pine iriluke ai mere esi buaije eteku eleki au kanele.”
TUHANE Alla Itneu bina mere be, “Le mula pine aono ele mere?” Bina mere iralake be, “Niakwe lemake lokoku, eti au kanele.”
Eleki TUHANE Alla Ibeteke loko niakwe mere be, “Bei pusue binatana rebe pialaule kai binatana rebe ume neure, ale pine asupu kutuke; amesa kena tibuimue kena lopone mpe tapele eti pela.
Namake Au ono ale kai bina meije imi musu kai lomai, amu anubuaru kai eni anubuaru esi musu kai lomai rame. Eni anubuaru esi reru ale kai amu anubuaru ulubuaimu kai amu anubuaru esi kete tuneije kai eni anubuaru tuneisu.”
Eleki Ibeteke loko bina mere be, “Kena akeu blublulure Au ono susate etemu boka titinai, kai kena aruele kwetele ablake kera titinai. Masike ele mere po lalemu loko amu mokwai kena ntulu kaini rame, po ikbasae ale.”
Eleki Ibeteke loko mokwai mere be, “Alene loko amu bina ilepare eleki akane ai buai bei aini rebe Au lake ale be kane more, hoko Au kutuke tapele bei ale. Eti amatare akerike ktili titinai mina pine asupu manane bei tapele.
Tapoane nlulinaru ukusu kena tapele meije ete ale, kai amu manane kena tnanela me neuaru.
Akerike ktili titinai eti knatikemu susuike pine asupu manane, eti amata kai aono tapele suike, le ale, onomu bei tapele. Ono ale bei tapele hoko aono tapele suike.
Mokwai mere eni nane Adame, iono eni bina eni nane Hawa, le ile pine iono inate ete pusue tamata.”
Hoko TUHANE Alla Iono pakeane bei binatane usai ete Adame kai ete eni bina, eleki Ialike kenasi.
Mere pela eleki TUHANE Alla Ibeteke be, “Tinai, tamata esi ono saka Ite peneka, esi rekwa misete kai tiare peneka, hoko meije yapine esi rana suike bei ai aini rebe eono hidupe mere esi buaije kai esi kanele, eleki esi rue eti pela.”
Eleki TUHANE Alla Isuisi bei ndinu me Edene leke Adame ikerike loko tapele rebe onoi beije.
Isuisi keu me ndinu mere esi sapleuke lemataije sare, kai Itolae kerupa kena uraka kai sari rebe auwe klitine kliti beie kai ere ahlakwa keholi rame ete mere, leke eraka lalane loko ai aini rebe eono tamata ihidupe. Hoko sae isupu kusu loko ai aini mere mo.